Ua amata tapenaga a le Manaia Events o loo faauluulu i le susuga Leiataualesa Jerry Brunt i le sailia o se tamaitai o le atunuu e fai ma sui o Samoa i le tauvaga tausala o le lalolagi aoao poo le Miss Universe.

O le vaiaso nei na faalauiloa ai lea faamoemoe ua iai ma le lagolago autu a le kamupani telefoni ma fesootaiga o le Vodafone Samoa.

O se tasi lea o tauvaga faavaomalo o le a avea o se faalauiloa tāua mo le atunuu i le lalolagi aua lava le atinae o tagata tafafao.

Ua molimauina ua siitia pea le tulaga o Samoa i tauvaga tausala faavaomalo ua mafai ona tausinio ai, o le Tausala o le Pasefika, Tausala o le Kelope, ma le Tausala o le lalolagi aoao le Miss Universe.

O le tauvaga na sailia ai se tausala o le kelope le Miss Global lea na maualuga ai le tulaga na ausia e le sui tauva o Samoa na tulaga lua poo le first runner up.

Ua faailoa e le pulega o le Manaia Events o loo iai nisi o tapenaga o loo fia faamautu ona faatoa faailoa ai lea o le tatalaina o le avanoa mo tamaitai e fia lesitala e avea ma sui tauva e saili ai se sui o Samoa mo lea tauvaga tausala faavaomalo.