A o vevela ai faalauiloa ma faasalalauga a vaega faaupufai o le faigapalota tele a Niu Sila, lea ua toe tasi le masina ma nai aso – ua fai mai Winston Peters o tagata Maori e lei faapea a mea na tupuga ane i laufanua o Niu Sila poo i latou nei o ni tagata moni.
Saunoaga nei a Peters a o iai i le fonotaga i Nelson ananafi, ma i le talatalaga ua ia fai mai o tagata Maori o tagata folau mai Hawai-iki, e talitonu e mai le Atu Kuki.
Ona o tagata na folau mai isi atunuu ma omai faamautu i Niu Sila, ua faasese ai e Peters talitonuga o tagata Maori o tagata na tupuga ane i eleele o Niu Sila.
A o talanoa ai i eleele ma le tupuga ane o tagata Maori i Niu Sila, e le auai ai foi Peters i le taumafaiga o loo talanoaina ai le tatau ona tasi le pulega e vaaia le suavai i totonu o Niu Sila poo tagata Maori, ma ia saunoa ai e leai se Maori e anaina le suavai.
Pe a tuu mai foi i le suiga ua suia ai nei le pulega o le soifua maloloina faapea ai ma lona igoa Maori, Te Whatu Ora, e lē tāua tele ia Peters le igoa Maori pau o lea pe Maori pe papalagi, pau le manaoga o le tagata ma’i – o le fia maua o le togafitiga.
E tusa ma le tolu selau i latou sa auai i le fonotaga lenei i le Trafalgar Centre a o saunoa le taitai o le NZ First ananafi.
