O le agai atu o le minisita o le va i fafo a Niu Sila, Nanaia Mahuta i Europa e auai ai i se feiloaiga a minisita o le va i fafo a le NATO (North Atlantic Treaty Organisation) ua faaalia ai se finagalo o se tasi o polofesa i mataupu tau polokiki i le Iunivesite o Otago o Robert Patman e faapea o le mafutaga a Niu Sila ma le NATO ua iai i se tulaga vavalalata i le taimi nei, e lei leva nei ona malaga mai sui o le militeli a le NATO i Niu Sila i le masina talu ai.

I lea malaga mai na feiloai atu ai ia sui e toalua i taitai o le militeli a le atunuu ma sui foi mai le matagaluega o le va i fafo ma fefaatauaiga.

Fai mai le alii polofesa o se tulaga talafeagai, o le NATO o se totino aupito i tele lea i tulaga o puipuiga i le lalolagi ma o se tulaga tāua le lelei o sootaga tau le puipuiga a Niu Sila ma isi ana paaga i tulaga tau tamaoaiga. 

Ua faailoa i le lipoti ua silia ma le 25 tausaga o galulue pea soosootauau Niu Sila ma le NATO ma sa muai avea Niu Sila ma paaga i le 2012 ae o le Palemia talu ai o Jacinda Ardern le uluai taitai mai Niu Sila ua faia sana saunoaga i le fonotaga a le NATO na faia i Madrid i le tausaga na tea nei.