O loo tele lava le manaoga mo le malo ia fesoasoani i tagata aafia o Aukilani ona o lologa na iai nei.
I totonu o le aso e tasi talu ona tatala le Pacific Response Hub ae ua silia ma le 100 aiga ua faatalosaga atu iai mo se fesoasoani.
A o tele ai le fesoasoani tau lavalava, meaai ma foai e tauala mai i faalapotopotoga eseese faapea nisi o auaunaga tuma’oti, ae na ta’ua e le Whanau Ora o loo moomia pea le fesoasoani a le malo.
O le isi itu o loo faigata ma o loo tele foi ina toe molimau ai i latou o loo asiasia fale o aiga aafia, o le itu i le mafaufau.
Mai le South Seas Healthcare ua molimau i lipoti a le 1News le toatele o aiga Pasefika o loo aafia e le o i fale ua saunia mo tagata ua leai ni fale, peitai o lea ua ua faaomiomia nei i totonu o le fale e tasi o nisi lava o latou auaiga.
O le popolega ua iai nei o le soifua maloloina o aiga toatele aemaise o le agai i luma.
Mai ia Josephine Bartley o se tasi o councillor i Aukilani, o lona manaoga ia aumai le ami e fesoasoani i aiga aafia o Aukilani i Saute a o lē faigofie ai e le aufaigaluega ona tau faasoa ona ua tele le manao.
Ae mo aiga ua le iloa poo fea a sulu iai ona o le leai o ni inisiua, ua faatalosagaina foi le fesoasoani a le malo.
O saunoaga a le Palemia Chris Hipkins ananafi o loo ave ai lana faamuamua e fesoasoani i aiga aafia ona o lologa.
