O lenei faamoemoe o le a faaaogaina o se aua e faalauiloa ai se tasi o faafitauli o loo tele ina tupu pea i nofoaga tulalata i le sami.

Na saunoa le sui a le Asosi Alovaa a Samoa, Matthew Wendt o lenei faamoemoe e faapupula atili ai le aafiaga o le gataifale mai lapisi plastic o loo lafoa’i iai.

“O loo faia pea faatalatalanoaga ma le ofisa o polokalame e puipuia le siosiomaga a le Pasefika poo le SPREP ina ia mafai ona faia faalauiloa i nofoaga o le a faatino ai alogavaa e faamalosia ai le taofia o le faaaogaina o plastics ona o se vaega pito sili lea ona faaleagaina ai le gataifale.

“Ma o le taaloga tonu lava lenei e tatau foi ona faamalosia ma faalauiloaina puipuiga ma fesoasoani i le faaitiitia o lenei tulaga aua o le taaloga e faatino i le gataifale.”

O le naunautaiga a le Asosi e faatino pea lenei auaunaga i le mae’a ai o le tauvaga.

“E iai le manatu i le Asosi e fia faia se campaign e tusa lava pe mae’a le faamoemoe o loo omai ai nisi o ‘au mai isi atunuu ae matou te taumafai lava e faaauau.”

“E fia fausia ni faailoilo e taofia ai le faaaogaina o plastics ma le lafoaiina o lapisi plastic i le sami, e fia fausia lea i nofoaga o loo famautu ai kalapu alovaa taitasi ma le tele lava o nisi gaioiga e fesoasoani ai foi i le puipuiga o le gataifale ma le siosiomaga.”