O le faaiuga o le suesuega sa faia i le sa avea ma Palemia talu ai o Ausetalia ma isi matagaluega faalilolilo sa aofia ai, o le a faamatuu mai i le asō pei o lipoti mai le 9News.
E tolu masina sa faatino ai le suesuega lea ma o le a tuuina atu le faaiuga i le Palemia o le atunuu, o le suesuega sa taitaia e lē sa avea ma faamasino i le faamasinoga maualuga o Justice Virginia Bell.
A o loma ai le faailoaina mai o le iuga o le suesuega ua faaleoina se faamatalaga mai lē sa avea ma se tasi o minisita o le faigamalo a Scott Morrison ma o le teutupe foi sa iai.
Ua ta’ua e Josh Frydenburgh i le Sydney Morning Herald sa ia tautua ma le faamaoni i lē sa avea ma Palemia i lea taimi ae na faateia i le mataupu na alia’e ai le aofia foi o Morrison i lea taimi i isi matagaluega e lei silafia e nisi o loo iai foi ni ona tofiga.
O taimi faatoa alia’e ai lenei mataupu na ta’ua ai e le loia sili o Stephen Donaghue e lei solia e Morrison se tulafono i le tofia e ia o ia lava i nisi o tofiga i matagaluega e pei ona ta’ua peitai o le nanaina o lea tulaga e le faailoaina o se tulaga ua ta’uitiitia ai faatulagana o se faigamalo lelei.
Sa maumauai pea Morrison e lei iai se mea sese sa ia faia ma o le tulaga ogaoga na iai Ausetalia i lea vaitau na mafua ai ona ia faatino ia tulaga.
E ui i lea o loo talitali nei le toatele i se iuga o le suesuega sa faia i lenei mataupu.
