O le vaiaso nei na asia ai e se alii na avea ma fuimu i Samoa le aiga o le tina ma le pepe lea na ia fesoasoani ai e faafanau i totonu o le taavale ave ma’i a le SFESA i le tausaga na te’a nei.
O le alii o Isaako Shiloh Vaipapa Asiata mai afioaga o Faia’ai, Satuiatua, Satupaitea, Salelavalu ma Salelologa i le na o le 21 ai o ona tausaga, na ia faatino ai lenei galuega fesoasoani.
I le talafaasolopito a le Pulega o le Tineimu ma Faalavelave Faafuasei talu ona faavae i le motu tele i Salafai, o le taimi muamua lenei na faafanau ai se tina ma’itaga i totonu o le taavale ave ma’i a le SFESA poo se ambulance.
I se faatalatalanaoga a le Radio Samoa ma Isaako Shiloh na ia ta’ua ai o le viiga lava e foi i le Atua ona o lona alofa e le gata i le pepe ma lona tina ae mo ia foi i le faatinoga ai o le galuega faigata na ala ai ona manuia mea uma.
O le masina nei i lona aso 21 e atoa iai le tausaga o Isaac Lumanai Petaia ma o se auala e faailoa ai le agaga faafetai o matua o Isaac ia Fuli Lumanai o Fogapoa i Savaii ma Lumanai Petaia o Salelologa i Savaii i le galuega alofa a Isaako Shiloh lea na o laua faaigoa ai le la pepe i le igoa o lea Samaria agalelei.
Ina ua fesiligia e le Radio Samoa le susuga Isaako i le mafuaaga o lona auai i le galuega fuimu na ia ta’ua o se moemitiga ua leva na ia moomoo iai a o aoga i le Kolisi o Levaula i Faleula.
I le tausaga e 2015 a o vasega 10 Isaako i Levaula na faia ai se polokalame faapitoa a le Ofisa o le Tineimu ma Faalavelave Faafuasei poo awareness programs. Mai lenei polokalame faapitoa na tonu ai i le loto o Isaako e fia avea ma alii fuimu i le lumanai. Ua na o ia foi le tama aoga na talia ma iai le naunautaiga e fia auai i le galuega mai lenei polokalame faapitoa.
Ina ua Vasega 13 Isaako na auai atu ai i se aso faalauiloa a le Iunivesite Aoao o Samoa (NUS) ma na ia sailia se mataupu e mafai ona aoaoina ai galuega tau fuimu, o i na ia iloa ai e iai vaega faapea i le Aoga Seila poo le Maritime School a le NUS.
O le tausaga e 2019 na auai ai loa Isaako i le Aoga Maritime a le NUS ma na i’u manuia ana taumafaiga. O le tausaga na sosoo ai (2020) na maua ai le avanoa e faigaluega ai i le Pulega o Tineimu ma Faalavelave Faafuasei a Samoa ma sa galue i le Ofisa i Maota i le motu tele.
O le masina o Mati o le tausaga na te’a nei na faia ai se course i mataupu tau paramedics ma e na o le 10 aso na faatino ai. E lei mafai ona aofia uma le tele o vaega tau ma’i (medics) i lea aoaoga ma i le 2 aso talu ona mae’a lea aoaoga ma faauu mai ai lea alii, na oo atu ai loa le valaau mai Salelologa i le aiga o Fiu ma Lumanai e manaomia se taavale ave ma’i a le SFESA. I lea taimi na ta’ua e Isaako e le’i mautinoa lelei poo le a le manaomiaga o le taavale ma e pau le manaoga a le aiga na valaau atu le 911 ina ia oo atu se taavale ave ma’i peitai e le’i faailoa atu o loo manaomia lea taavale e se tinā ma’itaga.
I lea taimi e na o Isaako ma le avetaavale ona sa livi lona taitai tamaitai. Na taunuu atu le taavale ave ma’i i le aiga i Salelologa ma faateia ai loa Isaako i le laa mai o le tina ma’itaga ua tigaiga. Na faanatinati atu i le falemai tele i Tuasivi peitai e vaai atu Isaako ua uma ituaiga gaioiga na ia taumafai ina ia faatuatuai ai le fanau o lea tina ae ua matuai luluti tiga ua le mafai ona tatali.
O lea lava taimi e ui e le’i iai se malamalama lelei o Isaako i le faatinoga o lenei galuega ma e le o fautuaina foi (recommend) e le Matagaluega le faafanau o se tina i totonu o le taavale ave ma’i a le SFESA ae na ia tatalo i le Alii e fesoasoani atu ia te ia a o taumafai ai e faatino lea gaioiga. Na molimauina lenei galuega e le avetaavale faapea le toalua o le tina.
Ina ua manuia lea gaioiga na faanatinati atu ai loa i le falemai i Tuasivi, o inā na u’u ai e le tamā o le pepe le lima o Isaako ma faafetai iai i lona faasaoina o le ola o si ona toalua ma lona atalii.
E le’i iai se mafaufau o Isaako o le a faaigoa e le ulugalii lo la atalii i lona igoa pau lona manatu e foi lava le viiga i le Atua auā ana le seanoa o ia e le mafai ona ia faatino lea galuega alofa.
O le tausaga na te’a nei na malaga atu ai Isaako Shiloh i Amerika o se alii seila ma na taumafai foi e saili avanoa e mafai ai ona faaauau lana galuega fuimu i luga o vaa tetele nei.
O le vaai mamao a lea alo o le atunuu poo le ā le ala e faasino atu e le Atua mo ia o le auala lea o le a uia.
