Mai le feiloa’iga a le Vaega Faaupufai a le New Zealand First ma le silia i le 200 o le mamalu o Samoa na potopoto i le Maota o Samoa i Magele i le Aso Faraile na te’a nei, na saunoa faamalamalama ai le ta’ita’i o le Vaega Faaupufai o le sui Palemia foi lea, Vaovasamanaia Hon Winston Peters, i le mataupu o loo finau ai Samoa mo le toe faafoi mai o le sitiseni Niu Sila o tagata Samoa na aveesea mai le tulafono o le Citizenship (Western Samoa) Act 1982.

Na saunoa le sui Palemia, ma ia ta’ua ai se la feiloa’iga ma le Palemia o Samoa, Hon Fiame Naomi Mataafa, na ia fesiliga ai Fiame i se finagalo o le faigamalo a Samoa i le mataupu lenei o le sitiseni, ma na saunoa ane Fiame, o le mataupu lenei e fitoitonu i le faigamalo a Niu Sila.

Na faaauau le saunoaga a le sui Palemia ma ia ta’ua ai le tele o itu e silasila i ai le faigamalo aemaise foi le tulaga o loo avea pea ma atugaluga o atunuu o le Pasefika e aofia ai ma Samoa, i le gasolo ese mai ai o le toatele o latou tagatānuu e saili manuia i atunuu e pei o Niu Sila, Ausetalia ma isi.

Na ta’ua ai e Peters le taula’i atu o le faigamalo a Niu Sila ina ia faamautinoa o loo latou faia le mea sili e fesoasoani ai i le itu tau i le tamaoaiga o atunuu o le Pasefika, ina ia mafai ai pea ona taofiofia ma faatupula’ia pea le aofai o latou tagatānuu auā le sologa lelei o fuafuagafai a atunuu ta’itasi.

Sa iai foi nisi faatalanoaga a le sui Palemia i ni taimi ua te’a sa ia ta’ua ai le lagolagoina e le latou vaega faaupufai o le pili o loo faagasolo nei, faatasi ai ma le fia silasila atili i nisi o fetuutuuna’iga e ono mafai ona faia iai.

Na saunoa Peters, o le ala lea na latou lei palota ai e taofia le pili, ae na latou lagolagoina le faasee atu o le nei tulafono taufaaofi i se komiti filifilia, ina ia faaauau faatalanoaga a o saili atu i ni finagalo o tagata ma o latou faanaunauga o loo iai e tusa ai o lenei tulafono taufaaofi.

Ona agai lea o lana saunoaga e auiliili le tele o galuega faatino a le faigamalo a Niu Sila ina ia saili vaifofo i nisi o faafitauli ogaoga o loo tulai mai lenei foi vaitaimi e pei ona iai aafiaga ona o le suiga o le tau, o le itu tau i le soifua mālōlōina ma isi, peitai na toe foi mai lava le saunoaga a le sui Palemia i le mataupu o loo naunau i ai le faafofoga a le aofia i lea aso, i le pili o le sitiseni, ma ia saunoa ai, ‘O le a matou faia le mea sa’o mo Samoa, faapea ma tagata ia sa tatau ona latou maua le avanoa a o lei oo i le 1948,’ ma ia ta’ua ai foi o le a se’i vaai poo fea o iai se finagalo o isi uma sui o le Palemene i lenei mataupu.

Na ta’ua e Peters, e iai le talitonuga o le vaega faaupufai a le New Zealand Firsti, e iai vaega lelei e ao ona silasila iai i le pili lenei, ‘E matou te lē faia ni folafolaga ona tuu ai lea,’ ‘Na matou faamautinoa ia faagasolo pea le talanoaina o le pili, ona e matou te talitonu e iai vaega lelei o le pili e ao ona silasila iai, ma a oo ina faamae’a uma ona talanoaina vaega nei, o le a matou logoina atu ia te outou le mea o le a matou faia.’

Na mae’a lea ona tulai foi lea o le sui sinia o le patī, Hon. Shane Jone e momoli lana faafetai i le valaaulia ma meaalofa na saunia e le mamalu o Samoa potopoto mo le latou aumalaga, ma sa ia ta’ua ai foi, ‘O le faanaunauga ma le agaga ina ia faia le mea sa’o, o le faavae mautū lena o le latou vaega faaupufai.’

O lenei feiloaiga sa tapena ma faamaopoopoina e le Fono Faufautua a Samoa i Aukilani, o le mafutaga soofaatasi a faifeau ma le Pacific Leadership Forum poo le PLF, lea na felafoa’i ai le Fetalaiga ia Leulumoega Teleiai Puni ma le Afioga Leiataua Savea Peseta Lavea mo lauga e faafeiloai le aumalaga, ma sa molimoli foi meaalofa o measina masani a le atunuu e faailoa ai le talia lelei o le faigamalaga.

Sa auai le Konesula Aoao o Samoa i Aukilani, Afioga Afemata Palusalue Faapo II ma le faletua, ma o le a’oga faaleaganuu a le Fofoa i Vaoese i lalo o le ta’ita’iga a le Tofa i le Vaimalae, Asiata Pio Vaoliko, na latou tapenaina le ‘ava o le feiloaiga.