O le a asiasi mai i Ausetalia le minisita o le va i fafo a Saina mo le uluai taimi talu mai le 2017 ma ua faamaonia lea faamatalaga e le Malo.

O le a feiloai ai Wang Yi ma le minisita o le va i fafo a Ausetalia Penny Wong i le Aso Lulu o le vaiaso fou i Canberra.

O le a faaauau ai talanoaga i le va o atunuu e lua i mataupu o loo galulue faatasi ai atoa foi ma mataupu faavaomalo.

Na faia foi se fonotaga faapea i le va o Wong ma Wang i le 2022 i Beijing.

Ua faailoa mai nei faamatalaga i le mae’a ai ona fautuaina e le matagaluega o le tamaoaiga o Saina le aveesea o lafoga totogi o loo tuuina e Saina i uaina a Ausetalia lea e faatau atu i lo latou atunuu.

Ua mae’a ona aveese e Saina lafoga faapea sa totogi e Ausetalia mo le auina atu o le povi fasi, barley, koale ma le cotton i totonu o Beijing.