Ua faailoa e leoleo o Joshua Tasi, 28 tausaga o North Shore lea na fasiotia i luga o le fetaulaiga ala i Beach Haven i Aukilani i le po o le Aso Faraile.

O le mataupu e tusa ma lipoti a leoleo o lea na valaau mai le ofisa i le faalavelave tau taavale, ma e faapea o tagata sa i totonu o le isi taavale lea na toe faaoomanua i lē ua maliu.

I lipoti a le Newshub na uma ona faaoomanua iai alii e toalua ona sosola lea, ma e ui i le taumafai ane o nisi e fesoasoani i lē ua maliu ae lei manuia ona o le tuga tele o manuaga ma uma ai lava lona soifua i lea taimi.

O le taeao o le Aso Toonai faatoa maua ai le toalua ua molia nei e tusa ma le fasiotia o Tasi ma o lea foi na maua mai le Far North, 17 ma le 14 tausaga.

O le asō e tutulai ai i luma o le faamasinoga o tupulaga talavou i North Shore e tali i moliaga o le fasioti tagata.

I molimau e faapea o Tasi na tatui (tulou), ma e faitau selau i latou sa iai i le sauniga na faia i luga o le auala i North Shore faapea le Beach Haven Community House e manatua ai Tasi.