A o iai i le aai tele o Niu Ioka i Amerika le usugafono a Samoa o loo ta’ita’ia e le afioga i le tama’ita’i sui palemia, le afioga, Mulipola Anarosa Ale Molio’o, ua lipotia le ō gatasi o fuafuaga mo le atina’e manuia o Samoa ma autū ua faailoa e le Failautusi o Malo Aufa’atasi e ao i malo uma; aemaise o atunu’u lāiti e lavea ai ma Samoa ona galulue fa’atasi e una’ia faiga e maua ai le filemu, le feoeoea’i, faatino taumafaiga e faafetaui ai suiga o le tau, ma tausisia pulega lelei ina ia maualafia ai ni aafiaga o galuega o le atinae manuia o tagata ma atunu’u ta’itasi.

Ua faailoa i faasalalauga mai le aai o Niu Ioka o loo usuia ai lea fono e tauaofia i le taimi nei i tausaga ta’itasi o ia autū ua faailoa e le Failautusi Aoao o Malo Aufa’atasi o loo faatāua foi e Samoa i lana faiga fa’avae o le atina’e manuia o le tatou atunu’u.

Advertisement

O sē tasi lea o manulauti o fuafuaga alualu mamao a Samoa ina ia si’itia le tulaga i le atina’eina o ona tagata e pei ona faailoa i se pepa o faamatalaga.

O le Aso Faraile i Amerika a’o le Aso Toonai lea i Samoa o le vaiaso nei, e folasia ai le finagalo o le Malo o Samoa i le tauaofiaga a Malo Aufa’atasi e le sui palemia le afioga, Mulipola Anarosa Ale Molio’o.

O lea fonotaga o loo auai ta’ita’i o malo o loo avea ma sui o Malo Aufaatasi.