O fanau faatau ula i le taulaga na mafua ai ona tapena e le afioga Leota Lene ma lona faletua o Clare le tauvaga siva ailao afi ua atoa le 20 tausaga o faatino e lea tamalii ma lana kalapu ailao afi i Samoa.
O le tauvaga lea na amata aoao ai ma fanau tama talavou sa faatau ula solo i le taulaga, ma oo ai ina popoto ma lelei i le faatinoina o le ailao afi.
Na faailoa lea tulaga e le afioga Leota Lene i le taualuga o le tauvaga siva ailao afi lona 20 na taualuga i le Aso Toonai na tea nei i le sailiga o le siamupini, lea ua sola ai i le vaega o alii matutua le susuga Vaelaa Iloa ma le faailoga tupe e $20 afe tala, tulaga lua le alii o Ieti Toomalatai ma le faailoga tupe e 10 afe tala, ae tulaga tolu ai Alema Alema na ia maua le faailoga tupe e lima afe tala.
I le vaega o tamaitai ua siamupini ai le tausala o Melanie Tia mai Niu Sila o se tasi na amata atu i Samoa lana taleni siva ailao afi, ae sa manumalo foi i le tauvaga i Hawaii i le tausaga e 2002.
O le tauvaga lona 20 o lea siva a Samoa sa auai se sui o le pulega o le Polynesian Cultural center i Laie i Hawaii faapea ma faamasino sa togiina le tauvaga sa malaga mai foi i lea nofoaga o faafiafiaga faapolenisia, faapea ma Amerika Samoa.
O le faatoa toe faia lea o se tauvaga ailao afi i le tuanai o le lua tausaga o tapunia tuaoi faavaomalo o Samoa ona o le faamai koviti.
