Lipoti lata mai i su’esu’ega a leoleo pei ona fofogaina mai e Tofilau Faamanuia Vaaelua ananafi, i le mae’a ai o su’esu’ega na faia ua iloa ai o auivi na maua i totonu o atopa’u e lua, e faapea o ni fanau e i le va o le 5 i le 10 tausaga le matutua.
O se su’esu’ega ae o se lipoti e lē faigofie i tagata e tusa ma saunoaga a Vaaelua ananafi, ma ina ua fesiligia e tusitala i le umi talu ona maliliu, na tali ai pe ā ma le 3 i le 4 tausaga.
I su’esu’ega ua faia nei e lē gata o le galulue ma leoleo i atunuu i fafo, o le nofoaga na teu ai nei atopa’u ae e le’i tuua i luga o le maketi e faatautu’i ae faapea ai ma le taumafai e saili cameras CCTV e ui e ono lē tele le fesoasoani ona o le umi o tausaga.
Ua toe faamautinoa mai ai foi e leoleo, e leai ma se aafiaga o le aiga Manurewa na faatauina le trailer lea na o atu ai atopau nei e lua ma fanau maliliu o loo su’esu’eina nei.
