O se alii mai le atunuu o Vietnam ua faamautu nei i se faletalimalo i le taulaga i se finagalo o le faamasinoga, e faatali ai le lauina o sona faasalaga i le Aso Tofi nei, ina ua faaulufale mai e lea tagata ni laau faasāina o le maruana e tusa lona mamafa ma le 6 kalama.

O lea tagata asia e faigaluega i Amerika Samoa, ae sa ia tuua le teritori i le faamoemoe e malaga i lona atunuu, ma afea ai le malaevaalele i Faleolo e pue ai le isi ana vaalele.

O suesuega a le vaega o le tiute na maua ai lea alii o ia umia laau faasāina faapea lona faaulufale mai i Samoa o maruana ae le faatagaina faaletulafono.

O le amataga o le masina na tea nei o Setema na taunuu ai i le malaevaalele i Faleolo. Na taofia ai i le vaaiga a leoleo ma faatali ai lona tulai i le faamasinoga, peitai o lea ua nofo nei i se faletalimalo ma faatalitali ai sona faasalaga. 

O se tala mai suesuega a leoleo i le osofaiga na maua ai se faatoaga maruana i Salelavalu i Savaii, ua molia uma alii e toatolu sa manaomia e Malu o le Malo i le umia ma le totoina o laau maruana, ma le tasi o taulealea ua molia i le umia o se laau malosi, faapea lona taumafai e faaoo le maliu ina ua ia faapa se ututau o le fana o le ituaiga o le 12 ma manunua ai ni alii leoleo se toalua.

O le isi toafa o taulelea o le nuu sa manaomia foi mo suesuega ua faaalia e le Komesina e lei tuuina atu lava e matai o le nuu e tusa o a latou faigaupu, ma na toe asia e leoleo matai i le Aso Lua mo le tuuina atu o i latou ia e toafa.

Ae i le auaunaga masani a le matagaluega o leoleo, falepuipui ma le ola toe fuataina o le a toe amata i le vaiaso nei feiloaiga masani a le sooupu o lea matagaluega ma le vasega o tusitala ma le aufaasalalau e pei ona faailoa mai e le Komesina le susuga Auapaau Logoitino Filipo.

O le feiloaiga lea o le a maua ai se lipoti o le faaiuga o le vaiaso na tea nei a o feagai le atunuu ma tapenaga o le faamanatuina o le Aso Sa o le Lotu Tamaiti.