Ua oo i le maple syrup lea ua nanā mai ai i totonu le fualaau faasāina o le aisa ae ua maua lelei foi e leoleo ma le ofisa o le tiute.
Saunoa le komesina o leoleo o Andrew Coster o le mataupu aupito telē lea ua maua mai tuaoi o Niu Sila sa galulue faatasi ai leoleo a Niu Sila, Ausetalia ma Kanata.
O le faamatalaga a leoleo na maua le uta lea o le maple syrup na aumaia mai Kanata, maua ai i totonu le 713 kilo o le aisa fai mai a faatauina e oo atu i le $250 miliona.
O le masina o Fepuari o le tausaga nei lava na pueina ai e leoleo ni alii se toalima mai Helensville ma le isi alii 28 tausaga sa pueina foi mulimuli ane.
Fai mai ana oo ona faatau lea uta tele e pei ona fuafuaina e i latou ia e le taumate e telē foi sona aafiaga i komiuniti aemaise o aafiaga foi i ē faaaogaina.
Na lipotia foi e le NZ Herald o le mae’a o le maliu o Aiden Sagala ona o aafiaga mai le inumia o le apa pia ua iai le aisa ua faaliusuavai ae na te lei iloaina na faia ai loa isi suesuega a leoleo ma maua ai foi se uta o fagu kombucha sa aofia mai i pailate o apa pia ua iai fualaau faasāina lea na maua ma ave e leoleo i le mae’a alia’e mai o lea faalavelave.
