Ua molimauina le aafia o le tele o faaitu o North Island i le malolosi ma le faata’uta’u o savili ma matagi i le amataga o lenei vaiaso, faapea le mamafa o timuga; e pei ona faamauina ai le motusia o le eletise i le tele o vaega o le atunuu; ae o loo faaalia le ono fetaia’i le atunuu ma le emo tele o uila ma faititili o le a faalogoina i se taimi o le asō.
Ta’ua i lipoti mai le leitio faavaomalo a Niu Sila, e oo atu i le 3,612 fale ma nofoaga na aafia i le motusia ai o le eletise, ma o loo faailoa na aafia lava faaitu o Foxton talu mai le itula e 10 i le po o le Aso Gafua.
Lipotia mai foi le faaopoopo atu o tagata galulue o le auaunaga a le Electra e fesoasoani i le galuega, ae ua o latou faaalia le tele o laina eletise ua aafia ona o le malolosi o matagi ma savili, ma e ta’ua e lē o mailoa se taimi ae o se aso e faaleleia ai.
Māua le pa’ū’u o laau tetele, na taofia ma tapunia ai ona toe uia ma faaaogā atu le auala o le State Highway 57 i le va o Tane Road ma Opiki Road, i le faaitu o Manawatū-Whanganui.
I itu i Sisifo o le South Island, na toe ola atu le eletise i Karamea ma Little Whanganui e faaaogā ai afi faaola eletise poo generators.
Faamauina i faamatalaga mai le ofisa o le vaaitau, le feagai pea o le atunuu ma timuga mamafa ma le malolosi o matagi e tō faata’uta’u mai Saute i Sasa’e; e aofia ai tulaga vaavaaia o loo iai faaitumalo o Tararua, Wairarapa ma gataifale o Kaikōura.
O loo fautuaina Marlborough Sounds, Nelson, ma itu i Sisifo o gataifale i Mātū o Fox Glacier se’ia pā’ia le aoauli o le Aso Lua, ae i le aga’i atu i le afiafi mo Ueligitone.
Ona o le tele o aafiaga ma le loulouā tele o le tau, o lea ua faamanino mai e le laulauafono a le itumalo o Tauranga, o lea ua o latou taofia ai le tele o faatasiga tetele ma polokalame sa faatulaga e faataunuu, o fiafiaga mo le Tausaga Fou.
O nei polokalame sa faatulaga i Matua, Pāpāmoa, Mount Maunganui, Greerton faapea le latou aai, peita’i na faaalia e le laulauafono, ua lē saogalemū vaega uma ona o le tau.
Ae o loo faamauina le ono faataunuuina pea o mea faapāpā i le afiafi mai le ‘afa o le 9 e aga’i i le 12 i le vaveao, pe a tusa ai ma le tala o le tau.
Puna o Faamatalaga: https://www.rnz.co.nz/news/national/582878/live-weather-updates-power-outages-heavy-rain-and-strong-gales
