O le motu o Savaii o loo iai le talitonuga o se vaega o ituaiga o tagata Maori o Niu Sila, o le amataga lea o le tala faasolopito o o latou tuaa ma matua poo tupuaga.
E afua mai lea i le Pulemelei i Vailoa Palauli o loo iai tala faamaumau e faapea o le nofoaga lea na amata mai ai le tupuaga o tagata Polenisia, ma folau atu ai isi ma ainā isi motu o le vasa Pasefika.
Ae o lea talatuu a tagata Maori na faailoa e le Kovana Aoao o Aotearoa Niu Sila le afioga Dame Cindy Kiro, ina ua saunoa faafetai i le tali faaaloalo o le taumafataga faalemalo o le aoauli, i le faamanatuina o le onosefulu tausaga o le Tutoatasi sa faia i Salafai.
Na faafetaia e le tamaitai Kovana le Palemia ma le Malo o Samoa i le valaau faaaloalo e auai i sauniga faaauau o le tatou Tutoatasi ua faagasolo mo le 12 masina, ma faagaeetia ai le Kovana i le matagofie o vaaiga o lea motu o le atu Samoa. O se vaega o le saunoaga a le tamaitai Kovana i le gagana Peretania.
O le tamaitai Kovana aoao o Aotearoa Niu Sila, Dame Cindy Kiro. Sa tauaao e le tamaitai Kovana se meaalofa mo le tamaitai Palemia o Samoa, e faapea foi ona tauaao e le afioga Fiame Naomi Mataafa se meaalofa mo le tamaitai Kovana aoao o le sui o le Tupu Tamaitai o Peretania.
O le taligasua faalemalo o le aoauli sa faia i le faletalimalo o le Amoa Resort ma o se tasi o tali faaaloalo sa saunia e le Malo o Samoa.
