A o loma ai le taaloga a le Manu Samoa ma le Ikale Tahi Toga i le Aso Toonai e pei na faatoa mavae atu nei, na faaalia ai e le Faiaoga o le ‘au Toutai Kefu le manaoga a o lei oo i le Ipu o le Lalolagi i Farani.

I se faatalanoaga ma le aufaasalalau i le mae’a ai o toleniga i le malae o le Apia Park i le Aso Faraile talu ai, na ia ta’ua ai le mataina o le tapenaga a le Ikale Tahi mo le taaloga i le aso e sosoo ai.

“O loo ua lava tapena le ‘au na malolo i isi taaloga e lua; toe tasi le taaloga lea a taeao ma le Manu Samoa ma le naunautaiga matou te fia o i Farani ma se manumalo.”

“O loo ave uma le malosi a le ‘au e finauina ai le taaloga lea taeao ma le Manu Samoa o se lu’i mo tama ia manumalo i le taaloga taeao.”

O se tasi o tama taalo iloga i le ‘au a le Wallabies a Ausetalia, Israel Folau lea na faailoa lona auai ai i le ‘au a le Ikale Tahi mo tapenaga o le Ipu o le Lalolagi.

“E lē o avanoa mai Folau o loo toe foi i Brisbane e fai ai le taotoga o lona tuli ae iai le faamoemoe o le a auai atu i se taimi o i luma i tapenaga a le ‘au mo Farani.”

O loo iai le fuafuaga o se aso o i luma o le a faalauiloa ai le ‘au filifilia a le Ikale Tahi mo le Ipu o le Lalolagi ae o loo tuu tasi uma mafaufau mo le faamoemoe a taeao.

Peitai e pei ona silafia le iuga o le taaloga a le Ikale Tahi ma le Manu Samoa i le Aso Toonai talu ai, na manumalo ai le Manu Samoa i ‘ai e 34 le Manu Samoa i le 9 a le Ikale Tahi.

Ua lē taulau ai moomooga o le alii faiaoga a le Ikale Tahi, Toutai Kefu ina ia maua se manumalo o lana ‘au a o lei oo i le Ipu a le Lalolagi i Farani.

Ae mo le Manu Samoa, e ui ina malolo i le la taaloga ma le ‘au a Fiti i le Aso Toonai o le vaiaso atu i ona tua, ae o le toe foi mai e manumalo i le ‘au malosi a Tonga, o se meaalofa lea mo le tapuaiga a lona atunuu a o tapena atu ai le Manu mo le Ipu a le Lalolagi i le masina fou.