O loo moomia le faamautinoaga mai pe oo suiga o le NCEA Level 1 lea na muai ta’u mai e le malo e amata aloaia mai le tausaga fou.
O le masina o Aperila lea na faailoa mai ai e le malo o le a toe tolopo suiga o le suega NCEA ae se’i ave uma le faamuamua i le matematika ma le tusitusi ma le faitautusi i le Igilisi, ma e le gata ia lava se taimi e tapena ai ae faapea ai foi le avega a faiaoga.
O suiga nei o le NCEA o loo faia auauai e pei ona iai le Level 1 i le 2024, 2025 o le Level 2 ma le Level 3 mo Vasega 13 e tatau ona aloaia mai le 2026.
Peitai o le vaiaso nei i faatalanoaga ma le minisita o aoga Jan Tinetti na foliga mai ai e le o mautonu le minisita poo le ā sa’o le tonu mo suiga o le NCEA lea na tau mo le 2024.
Mai le sui o le Post Primary Teachers Association ananafi, ua moomia le saunoa manino mai o le minisita poo ā suiga e amata aloaia i le tausaga fou ina ia lava tapena iai fanau ma faiaoga.
