O se tasi lenei o vaega tāua i tapenaga a le ‘au filifilia a Samoa mo taaloga a le Pasefika i Solomona o le afea lea o le Malo e tāpā sa latou faamanuia a o lei tuuvaa atu mo le faamoemoe i le vaiaso fou.
I se sauniga na faatinoina i le taeao analeila na avea le Sui Palemia, Afioga Tuala Tevaga Iosefo Ponifasio e tuuina atu se faamalosiau i sui taaalo o le a alo atu e tauaveina le tagavai o le atunuu i taaloga a le Pasefika i Saute.
“I le tausaga 2019 sa talimalo ai lo tatou atunuu i taaloga o le Pasefika sa molimauina le taupati mai o Malo eseese aemaise o le tulaga sa tulai mai ai le ‘au a Samoa i taaloga o lea tausaga.
“O le mau poo se aga tausili a le atunuu o le a talimalo i lenei tausaga i taaloga, ia tatou lu’itauina, tatou tutu faatasi ma fiafia faatasi.
“Samoa e, laga ia le mulipapaga, ua tatou talitonu i le Atua o le malamalama, fautuaga a o tatou tuaa ua lagomau mai tiasa, tafesilafai ma ulimasao lou sa.
“E avea ai la a’u ma Sui o le Afioga i le Palemia ma le Malo aemaise le atunuu atoa e avatu ai sa matou tala matou te faamanuia i la outou malaga.
“Ia outou finau ma le manuia auā se viiga o le Atua, manuia lo outou faamoemoe manuia foi lau tapuaiga Samoa.”
E 24 atunuu o le Pasefika o le a feagai ma faalagamaea o taaloga ua filifilia mo lenei faamoemoe ma ua tapena le ‘au a Samoa e amata faimalaga atu i le vaiaso fou i Solomona.
