O le faalapotopotoga o le Iuni o Malo Europa poo le EU (European Union) o loo tafe mai nisi o seleni mo le polokalame o le atina’e o tina nofotane i nisi o nuu ma afioaga o Samoa, ma o fesoasoani faapea, e iai le taimi e fia silasila ai sui o se faalapotopotoga e pei o le Iuni a Europa, poo faaaoga tatau tupe o fesoasoani i polokalame.

O le afioaga o Luatuanuu na afea e sui o lea faalapotopotoga tele o atunuu Europa, ma molimauina ai nisi o taumafaiga a tina nofotane o lea afioaga.

O le fesoasoani a le EU (European Union) poo le Iuni a Europa na fausia ai se maketi e faatau ai fua o faatoaga o loo galueaina e tina nofotane o Luatuanuu, aemaise o le gaosia o meataulima e faatau i le latou maketi.

O polokalame ia e pei ona faailoa e le faalapotopotoga o le Toomaga mo ē Puapuagatia o loo alu iai le fesoasoani a le Iuni a Europa, e fesoasoani ai i tina nofotane i le faia o atina’e e pei o faatoaga e maua ai seleni mo le tausiga o o latou aiga aemaise i le fanau.

Faaalia e le Toomaga mo ē Puapuagatia i se pepa o faamatalaga, na matua maofa sui o le Iuni a Europa i le lelei faatino o atina’e a tina nofotane o Luatuanuu ae o le faamoemoe ia saga faaleleia atili ma manuia ai i latou i le maua o seleni pe a faatau a latou meataulima ma fua o faatoaga.