Ua molia se alii leoleo o le falekalapu o le RSA i le taulaga o Apia i le faaoolima, faaoo manuaga tuga ma le taumafai e faaoo le maliu i se tamā e 48 tausaga le matua mai Samalaeulu ma Fusi i Safotulafai.
O lea faalavelave na ta’ua e le alii Komesina o Leoleo ia Auapaau Logoitino Filipo, na tulai mai i le 2 vaiaso talu ai.
O lē ua aafia o loo tau togafitia nei i le falemai ma o loo i se tulaga tigaina tele.
O le alii leoleo o le falekalapu o loo i lalo nei o le vaaiga a leoleo e faatali ai le aso 20 o le masina nei e tulai ai i le faamasinoga e tali i ona moliaga.
Ae na lipotia e le leitio Polenisia e faapea o le avetaavale laupasese laitiiti na ia molimauina le faaoogalima, ma o ia lea na ia aveina lē ua manua i le falemai.
Ua faailoa foi e se tasi o le aiga o lē ua aafia nei, o lona tausoga o loo mafatia tele i manuaga tuga i lona ulu ma e faafetaia ae toe manuia mai.
