I se isi foi faalavelave e aofia ai taavale ua faailoa i le aso ananafi ua faia moliaga i le aveloli lea o loo aofia i le mataupu na maua ai le tinomaliu o se tamā e toatolu si ana fanau i autafa o le highway i Sini i le itu i Saute Sisifo i ni nai aso talu ona maliu o ia.
O lipoti a le alaata 7 o loo ta’ua ai o le tamā ua maliu e mai Campbelltown o David Howard na maua lona tino maliu i autafa o le Hume Highway i le aso 12 o Oketopa o le tausaga nei lava ma e talitonuina na lavea i se loli i le lua aso i luma ane ae lei maua lea o lona tinomaliu.
Fai mai leoleo e leiloa pe na faapefea ona oo ane le tinomaliu o Howard i autafa o le auala ma o le mae’a o suesuega sa faia mai a leoleo mai lea taimi na failoa ai loa ananafi le pueina o se alii e 37 tausaga o se aveloli ma molia i le mataupu lea.
O le a tulai i le faamasinoga i Campbelltown i le masina fou o Ianuari. O le tamā ua maliu e 30 tausaga le matua.
