O le vaveao o le Aso Tofi o lenei vaiaso i Samoa ua taunuu ai i fanua le tino maliu o se tasi o tamafanau a le atunuu, sa galue o se pailate o le kamupani vaalele o le atunuu o Papua Niu Kini.
Ua faailoa i se lipoti a leoleo o le atunuu o Solomona ua latou taofia se taulealea 20 tausaga o lo latou atunuu, ona o le maliu o le susuga Ailoilo Fred Puni, 48 tausaga o le soifua ona o se faalavelave tau taavale na aafia ai lē ua maliu i le taavale na aveina e le tagata ua nofo taofia nei mo suesuega.
O lē ua maliu sa malaga i Solomona e feiloai ai ma se tasi o lona aiga o se fomai, sa aofia i le aumalaga o le autaaalo a le Atu Kuki sa tausinio i taaloga a le Pasefika sa faia i Solomona, ae fano ai lona soifua i le faalavelave.
O luga o upega tafailagi ma fesootaiga i le api o foliga o loo momoli ai le faafetai a aiga o lē ua maliu ia i latou uma i Solomona e aofia ai taitai o lea Malo ona o tapenaga uma aemaise o faaaloaloga mo Ailoilo Fred Puni, a o lei molimoli ma lona tino maliu i Samoa mo ona toe sauniga.
Ua faailoa mai e se tasi o le aiga le tofa Teleiai Edwin Puni, o le Aso Faraile nei i le 3 i le aoauli o le a faia ai le sauniga o le falelauasiga i le fanuatanu o lo latou aiga i Alafua.
