O le alii leoleo sinia o loo molia i moliaga tau sauaga matagā, sa tulai ai i le faamaisnoga i le vaiaso ua mavae peitai na toe tolopo lana mataupu seia talanoa atu i lana loia ma faamautu moliaga a leoleo.
Ae na faamaonia mai e le Komesina o Leoleo Auapaau Logoitino Filipo, o lea mataupu na oo atu ia te ia i le lua vaiaso talu ai.
Ma o le taimi foi lena na faia ai lana faaiuga e faamalolo lē tumau le alii leoleo satini ae faagasolo suesuega a le matagaluega.
Na faailoa mai e Auapaau, ina ua mae’a suesuega na faasee mai ai loa le mataupu i le faamasinoga e iloiloina.
Sa faaalia e le Komesina lona faanoanoa tele i le aliae mai pea o tuuaiga o loo aafia ai ma leoleo, peitai na faailoa manino e Auapaau e leai lava se tasi e i luga atu o le tulafono.
Ma e tatau lava ona tali i moliaga o loo tuuaia ai.
Na faailoa mai e Auapaau o le alii leoleo satini o loo tuuaia ua silia ma le 20 tausaga o galue i totonu o le Matagaluega o Leoleo.
O taeao o le a toe valaau ai lenei mataupu i le Faamasinoga Maualuga.
