O le aso ananafi sa tatau ona tulai ai i le faamasinoga le tagata lea na pu’eina e leoleo e tusa o le faalavelave ua tulai mai i le amataga o lenei vaiaso i Sini. Fai mai faamatalaga e 35 tausaga o se alii na tui e se tagata tulou i le itu i Sisifo o Sini poo le ‘afa o le tolu i le aoauli o le Aso Sa, taimi Ausetalia.
O le 9 News o loo lipotia sa iai tagata na molimauina o lē ua aafia na kolosi ane i le alatele i le pitonuu o Merrylands ae osofai ai e ni alii se to’alua ma faaoolima iai ma sosola ese ai ina ua tamomo’e atu nisi o le atunuu e fesoasoani i lē na osofa’a.
E taunuu atu le fesoasoani faavavave ma auina atu lē na aafia i le falema’i i Westmead lea o loo iai pea i se tulaga tigaina. O se taimi mulimuli ane na pu’eina ai e leoleo se alii e 31 tausaga ma ua molia i le faaoolima faamoemoeina ma fuafua e fasioti.
Fai mai leoleo e masani i laua o loo aofia i le mataupu lea ma o loo teena le tatala i tua o le 31 tausaga lea sa tatau ona tulai i le faamasinoga i Fairfield i le aso ananafi.
