E to’alua ua molia nei e leoleo i le fasioti tagata ma le loto iai poo le murder, i le maliu ai o se alii e 29 tausaga le matua, o Tristan Oakes i lona fale i Te Puke.
O le tasi o alii e 39 tausaga ae o le isi e 40 tausaga le matutua.
O lea matāupu na alia’e mai ina ua lipotia atu i leoleo le tuuina atu o se alii i le falema’i ma ni manu’aga mai se laau malosi poo le ‘afa o le 10 i le taeao o le Aso Toonai o le vaiaso ua mavae atu.
O le tugā tele o manu’aga o lea alii na maliu ai lava o ia i le taeao o le Aso Sa.
Na faasolo loa su’esu’ega ma sa’ili’iliga a le auaunaga i le māfua’aga o lea matāupu ma e ta’ua na faasolo loa le galuega tausa’ili a leoleo i alii ua molia nei.
O le asō Aso Tofi, na faatulaga e tula’i ai i la’ua i luma o le faamasinoga i Tauranga e tali i o la moliaga.
Ua faafetaia e le auaunaga a leoleo, tagata lautele mo le fesoasoani e tusa ai ma lea matāupu.
Puna o Faamatalaga: https://www.rnz.co.nz/news/national/577232/two-men-charged-with-te-puke-murder
