Ua iai le tagata lona lua ua molia i le faalavelave ua feta’ua’ina ai le tafanaina o se tamā ma sona atalii i Western Sydney i le tausaga talu ai.
O le ausuesue sa feagai ma le mataupu lea ua o latou pueina le alii 20 tausaga mai Grafton i le Aso Lua ma molia ai o ia i le maliliu ai o Salim 18 tausaga ma lona tamā o Toufik Hamze 64 tausaga.
Na tafana a o saofafai i totonu o le la taavale i Guildford i le masina o Oketopa 2021. Na maliu ai lava Salim i lea nofoaga a o lona tamā na togafita e paramedics, auina atu i le falemai ma maliu ai mulimuli ane.
O le alii 20 tausaga la lea ua molia nei i moliaga e lua o le fasioti tagata. O le isi alii na molia muamua e 25 tausaga le matua ua molia i lona auai ai foi i le mataupu lea ma o nei vesiga ua maitauina pea i totonu o Sini mai lava i le amataga o le tausaga ma tausaga foi ua tuanai ma ua silia ma le 250 tagata ua pueina ma le silia ma le 800 o moliaga ua faia e leoleo ona o nei ituaiga faalavelave.
