Molia le avetaavale lea na maliliu ai le aufaigaluega a le Starkist

E $75,000 tala Amerika le tino i tupe ua tuu iai le mafai ona tatala i tua poo le bail a le ave taavale lea na mafua ai ona uma ola o tagata o le aufaigaluega  ale Star Kist i Amerika i le vaiaso na te’a nei.

O se tamā mai le motu tele i Salafai e atoa iai le to’afa o i latou na maliliu ina ua manava galuega a lea aufaigaluega. O lenei faalavelave na tulai mai i le faaiuga o le vaiaso na tea nei lea na uma ai ola o ni tamā matutua e to’atolu ma se Alii talavou e toatasi. 

E le’i taliagofie e aiga o i latou ua maliliu le tala faanoanoa aemaise lava ua lata mai aso fiafia ao lenei ua fano ola ona o le ave taavale faatamala ma le lē migao o nisi. Taua i ripoti a le Samoa News e faapea “Na taua e nisi o tagata faigaluega sa i ai i le taimi na tula’i mai ai le faalavelave e faapea, o se ta’avale na tuli atu ma le taavale Leoleo, lea na alu atu ma so’a le isi ta’avale i luma tonu lava o le faitoto’a tele a le Kamupani, lea na tula’i mai ai loa le faalavelave ma maliliu ai alii e to’alua sa i totonu o le ta’avale, ae lelea atu le ta’avale na tuli e Leoleo i totonu o le pa a le Kamupani ma maliliu ai isi ali’i e to’alua”.

O loo masalomia le aafia ai o ava malosi i lenei faalavelave ma na auina atu foi i latou na i totonu o le taavale na afua ai le faalavelave i le maota gasegase mo togafitiga. 

O le tamā mai Salafai lea na uma lona ola i lenei faalavelave o le susuga ia Aletina Uaita Faleai o Fatausi Savaii. Na tuuina atu ai foi faamaisega a le Ekalesia Faapotopotoga Kerisiano Samoa a lea afioaga i le aiga o le tamā ua fai i lagi le folauga. 

Share on facebook
Share on twitter
Share on email
Share on whatsapp
Scroll to Top

Keep uptodate with Radio Samoa activity & promotion

* indicates required