E 18 tausaga o se tamaitai ua molia nei e leoleo i le fasioti tagata i le mae’a o le maliu o se teine e lua tausaga le matua i Hamilton.
O lipoti mai le televise a Niu Sila ua ta’ua ai o le suesuega sa faia i le maliu o le teineititi lea ua tuuina mai ai ma se lipoti a leoleo e faapea o le aso 9 o Aperila na tupu ai le faalavelave lea na aafia ai le teineititi na ave atu ai i le falemai ae maliu ai lava i le afiafi.
O le aso ananafi na fuafua e tulai ai le 18 tausaga lea i le faamasinoga ae o nisi faamatalaga o loo lipotia e faapea o se petolo a leoleo na agai atu ananafi lea ae faatu ane e se tasi sa malaga atu i se taavale i Heaphy Terrace o loo manaomia se fesoasoani i le teineititi o loo aofia ma auina atu ai loa i le falemai mo se fesoasoani peitai e lei manuia togafitiga ma maliu ai lava.
