E 78 tausaga o se tina matua o loo suesueina nei e leoleo le mafuaaga o lona maliu, ae ua molia ai se isi tamaitai ua 57 tausaga le matua i le solitulafono o le fasioti tagata faamoemoeina.

O le faalavelave lenei e pei ona faailoa e leoleo i se lipoti na tupu i le Aso Toonai o le vaiaso na te’a nei, ae na faato’ā logoina leoleo i le amataga o le vaiaso ma amata ai suesuega.

O lē ua molia o Papalii Sia Figiel, o se tamaitai o le atunuu e lauiloa i lona tomai o le tusia o solo ma tala fatu.

Tele nisi o ana tusitusiga ua salalau i le lalolagi ma ua maua ai ona faailoga taualoa i nisi o ana tusitusiga.

O le amataga o le vaiaso na amata nofo taofia ai i le vaaiga a leoleo lē ua tuua’ia, a o faagasolo ai pea suesuega a leoleo.

O le fale na faatino ai le solitulafono o se meatotino a lē ua molia ma o se nofoaga e faatino ai ana faalauiloa o ana solo ma tala fatu.

I se lipoti a le vaega faasalalau o le Talanei, o loo ta’ua ai o le tina ua maliu i le faalavelave o se tagatanuu o Amerika Samoa, o se tamaitai faiaoga, o se tasi foi e iai ona tomai i tusiga tala ma solo fatu.

O lona suafa o Dr Caroline Sinavaiana Gabbard, sa faiaoga i le Community College i Amerika Samoa faapea ma le University of Hawaii, ae i nai tausaga talu ai ina ua malolo litaea ma agai mai loa e nofo i Samoa Tutoatasi.