E silia ma le $2 miliona ua toe molia ai se tasi o tagata sa faigaluega i le Oranga Tamariki i ni faiga faaalatua.
O Neha Sharma, o se tasi sa property manager i le Oranga Tamariki o lea ua tuuaia e le Serious Fraud Office e silia ma le $2 miliona le tau atoa o galuega na ia tuuina atu i le kamupani a lona toalua e aunoa ma le iloa e le Oranga Tamariki.
Ua molia faatasi ai nei i faiga taufaasese atoa ai ma le toe faaui o tupe nei na maua mai konekarate faia faasolitulafono i se auala e nanā ai.
O loo molia foi le tamaitai ia Neha na ia faaseseina faamaumauga ma e pepelo foi faamaumauga na ia faailoa ia maua ai lana galuega.
O fale a le pulega i Canterbury lea o loo tuuaia ai Neha na ia taumafai ia maua uma e le konekarate a lona toalua e aunoa ma le faailoaina o le conflict of interest.
O tupe eleelea o loo toe tuuaia ai e faapea o lea sa lafo agai i Initia ma o loo galulue ai nei le ofisa o leoleo e toe faafoi mai.
O loo i Initia Neha seia vagana ai lona toalua ia Amandeep Sharma lea na tu i luma o le faamasinoga i Kalaiesetete ananafi.
