Ua faamaonia mai e le Alii Komesina o leoleo le Tofa Auapaau Logoitino Filipo e toasefululua ua molia e aofia ai matai e toaono ma taulelea e toaono.
E 11 ua molia i le taupulepule ma le auai e ave faamalosi le isi tagata, o le faaoolima ma le umia o aupega matautia.
O le toasefulutasi ua tatala i tua e faatali ai le valaauga o la latou mataupu i le faamasinoga i Tuasivi i le aso 3 o le masina fou.
O le isi matai e toatasi e atoa iai le toasefululua ua molia nei i le taumafai e faaoo le oti e ala i se tamai naifi (tulou), ma o loo molia foi i le umia o le auupega matautia.
O lea matai o loo taofia i Tanumalala e faatali ai le aso 25 o le masina nei e tutulai ai luma o le Faamasinoga.
O se vaaiga ese ina ua tuuina atu i upega tafailagi le ata sa pueina e nisi, o loo faailoa ai se vaaiga faatoa toe alia’e mai i Samoa i le vaiaso ua mavae atu i le afioaga o Lefagaoalii i Savaii.
Na faailoa e le Alii Komesina le faanoanoaga i le faalavelave ua tulai mai, ma gaioiga a ē ua molia na faia, ma tuuina mai ai lana fautuaga mo afioaga, aemaise lava i le saofaiga a matai ina ia saili atu i le faamasinoga o fanua ma suafa se tali o mataupu faapea, o i latou e aumai ai se faaiuga e filemu ai nuu ma aiga.
Ua ia ta’ua foi e lē faavaivai lava leoleo e faatino a latou galuega o le molia o i latou e solia le Tulafono.
