Ua faailoa e leoleo e 28 tausaga le matua o se alii mai Sini ua feta’ua’ina le molia i le taufaasese i se tamā matua sa ia vaaia ma ua maliu.

LIpotia e le 7news o Ianuari na amata suesue ai e leoleo le mataupu lea ina ua lipoti ane e le aiga o si tamā matua lea 73 tausaga na maliu ia Aokuso o le tausaga talu ai, fai mai le aiga o loo ua gaoia e le tagata le credit card a le tamā lea ma faaaogaina.

O le vaiaso nei na pueina ai e leoleo le alii lea e 28 tausaga mai se fale i Punchbowl ma aveina atu ai i le ofisa o leoleo i Campsie mo suesuega.

Mulimuli ane molia ai i le maua o ni faamanuiaga i auala taufaasese ma le le faamaoni.

O loo feta’ua’ina foi sa ia faaaoga le credit card a si tamā lea e totogi ai ana faatauga o lavalava, meaai ma sikaleti, auaunaga e matamata ai i luga o upega tafailagi faapea ma faigamalaga i auala o femalagaaiga lautele.

E lei tatalaina i tua ma o loo faaauau le suesuega.