Ua faailoa e leoleo i Samoa le faia o moliaga faasolitulafono faasaga i se tasi o taitai leoleo o loo faamalolo lē tumau, le susuga Faataumalama Auava, e mafua mai i le suesuega na faia e le taitai leoleo ma nisi Malu o le Malo e toalua e aofia ai se tamaitai leoleo, i le faalavelave tau taavale na aafia ai le soifua o le atalii o Tuuau i le tausaga e 2021.
O se suesuega na faia e aunoa ma se faatagaga a le Komesina o le Matagaluega o Leoleo, Falepuipui ma Toe Fuataina, ae o se suesuega na mafua ona faatino ona ua lē iloa poo fea ua fai iai le suesuega muamua na faatino e leoleo ina ua faatoa tupu le faalavelave.
Ua faaalia e Faataumalama i luga o lana itulau i le api o foliga ua avea faasalalauga i ona moliaga ua faia e leoleo ma avanoa ua lauiloa ai lona tagata.
“Ua makuā ova lo’u popular i lenei vaitaimi i faiga a le aufaasalalau….a tou lailoa lava…manatua ai le fetalaiga a le Alii Faaola, ‘Tamā faamagalo atu ia te i latou auā ua latou leiloa le mea ua o latou faia…’ Mo nai o’u aiga o uo mamaē ma pēlē i le mafutaga o loo tatalo mai pea ma tapuaia lo’u faamoemoe, ia aua ne’i mate le lamepa o le faatuatua ma talitonu, e malosi lava le mea moni ma o le a faaalia e le Atua i lona lava taimi e finagalo ai…Aua tatou te atuatuvale o loo soifua le Alii…Fai mai ea le Laaulialemalietoa, ‘I’LL BE BACK’.”
O le aso 27 o Fepuari le Aso Lua o le vaiaso nei, o le a tulai ai i le faamasinoga faaitumalo i Mulinuu le susuga Faataumalama Auava mo le valaauga muamua o ona moliaga o le taupulepule e fafau ni mau e lē moni.
O moliaga foi ia o loo tuuaia ai le afioga i le Faipule o Salega Tasi le Afioga Fepuleai Faimata Su’a ma o le a tutulai faatasi i laua ma le taitai leoleo.
O le valaauga foi lea o le mataupu lenei o le a toe oo atu ai Samuelu ma lona toalua o Sivai i le faamasinoga, faapea le tamaitai o Lise Schmidt.
O i latou uma nei o loo molia e leoleo ona o le faia o ni taupulepulega e fafau ni molimau e lē moni, atoa ai ma tala taufaaleaga.
