Ua uma le faitauga aloaia o le palota, ma o lea ua lē faamanuiaina le sui Pasefika e toatasi o le pati a le National.
E uma le faitauga muamua o le palota o loo 30 palota e sili ai Angee Nicholas o le National i le sui o Te Atatu i Aukilani i Sisifo poo le sui ua tele tausaga o tauavea mai lea vaega o Aukilani i lalo o le fu’a a le Labour.
Peitai i le mae’a faitauina o palota faapitoa ma le faitauga aloaia o le faigapalota tele a Niu Sila, ua toe mautinoa ai le toe foi mai o Phil Twyford o le Labour, i palota silia e 131.
E lei faigofie ia Twyford pe a fua i le tele o tausaga o ia tauavea mai lona itumalo, ae o lea na semanu e mamulu i le tamaitai Atu Kuki talavou faatoa momo’e, poo lē foi sa faamoemoe e maua ai se sui o tagata Pasefika i totonu o le faigamalo.
Sa iai le lipoti muamua atu e faapea ua sao i totonu o se faipule mai le lisi a le National le isi sui Pasefika, le tamaitai Samoa o Agnes Loheni, peitai i le mae’a ai o le faitauga o palota faapitoa o lea ua sau ai le lipoti a le NZ Herald, ua lē sao i totonu le tamaitai o Agnes Loheni mai le lisi a le National.
