Maualuga pea palota a le National – Kantar Public Poll

O loo tumau pea le maualuga o palota a le National ae o le Labour ua atili pa’ū i tua. 

39% palota a le National, pa’ū le isi 2% a le Labour ma iu ai i le 35%, Greens ua alu i luga i le 1 ma maua ai le 10%, ACT e 7% ma le pati a Maori o loo tumau i le 2%. 

Tuu mai i le Palemia e manana’o iai tagata, e ui o loo sili pea Jacinda Ardern i le ta’ita’i o le National, Christopher Luxon, peitai ua sau i lalo le pasene o palota a Jacinda. 

O le iuga lea o le palota faapolokiki a le 1News Kantar Public Poll, ma a faatusa i le palota lava lenei na faia ia Mati, o loo alualu pea i luma le National ma e foliga mai ai ua fai lava si pa’ū o le lagolago mo le Labour. 

O le piriota foi na aoao ai finagalo o le 1,002 tagata palota agavaa na filifilia mo lenei faigapalota faapolokiki, na faia lea mai le aso 21 i le 25 o Me poo le faatoa uma lava lea ona faailoa mai e le malo o lana paketi mo le 2022 faapea tapenaga a le malo mo le suiga o le tau. 

A o foliga mai ai la e lē o fesoasoani le paketi mo se suiga mo le Labour, a faaliliu pasene i nofoa o le Palemene ua toe iai foi le pati a Maori i le ogatotonu o le fausia o se faigamalo.