Ua lipotia mai le amata tapenapena ai o faaitū o South Island i tulaga o le tau ua faailo mai e le vaega o le vaaitau, e pei ona māua o le a fetaia’i lea itu o le atunuu ma timuga mamafa, o le malolosi o matagi e agi mai sisifo.
Ae o le a fa’amauina maualuga o le vevela o le a iai i le tele o faaitū o Aotearoa i lenei vaiaso.
Faamauina e le sui o le vaaitau ia Braydon White, o susū o savili mai la’i poo itu sisifo o le a vaaia ai ni timu e toulu Southland ma Otago, e aofia ai Invercargill ma Dunedin.
Ta’ua le malolosi o savili o le a aafia ai itu o South Island West Coast, ma e ono aafia ai foi ma Kalaiesitete.
Māua le malolosi o savili i Greymouth, Hokitika ma Milford Sound, e agi mai faapei o ni matagi ae e lē faata’uta’u ma vaega e ono faapopoleina ai nisi.
Ta’ua i ripoti i le agai ese ai o savili, o le a molimauina le maualuga o le tikeri o le a iai le vevela, e pei ona faamauina o le tele o le taimi mo lenei vaega o le vaiaso o le a silia atu ma le 20 tikeri, ma agai atu lava i le 30 tikeri i le Aso Faraile mo le tele o faaitu.
I le agai atu i totonu o faaitu sasa’e o North Island e aofia ai Gisborne, Napier, Hastings, Tauranga, and Whakatāne, ua amata vaaia le maualuga o le vevela ua iai nei.
Ta’ua o le faaiuga o le vaiaso o le a faalogoina ai e le toatele le matua’i vevela tele o le ea.
Puna o Faamatalaga: https://www.nzherald.co.nz/nz/weather-heavy-rain-wind-to-hit-bottom-of-south-island-temperatures-to-push-into-30s-for-parts-of-aotearoa/WV2C3YRAM5D63ILNQQP5TNXRBE/
