O loo maualuga le silasila a le tamaitai Failautusi o le ofisa o Malo o le Taupulega o loo i Lonetona i Peletania, le tamaitai o Patricia Scotland, i le lelei o loo faatino ai tapenaga uma a Samoa mo lana taligamalo i le fono a ta’ita’i o Malo o le Taupulega i le masina o Oketopa.
O le maualuga o le vaavaai mai a le faauluuluga o le ofisa o Malo o le Taupulega i le tulaga o loo iai tapenaga a lo tatou atunuu, ua ia faalēaogā ai ma lipoti a le nusipepa o le Telegraph i ni faaletonu o aafia ai le faletalimalo o le a faamautu ai le faauluuluga o Malo o le Taupulega le Tupu ma le Masiofo o le malo o Peletania.
Ua faaalia e Patricia Scotland i lea leitio faasalalau, o lea lipoti a le nusipepa Peletania e lē o aveesea ai le faatuatuaga o lona ofisa i le tulaga mapo o loo iai tapenaga a Samoa.
Ua faailoa ai foi e le faauluuluga o le ofisa o Malo o le Taupulega ua malamalama uma ta’ita’i ma usugafono o le a malaga mai i Samoa, o se atunuu laititi tau atia’e o le Pasefika o le a agai mai iai, ma ua latou silafia foi tulaga uma.
O le fono a ta’ita’i o Malo o le Pasefika i le masina fou o le a auai le tamaitai failautusi o Malo o le Taupulega, lea o le a feiloai ai ma ta’ita’i o atunuu o lenei faaitulagi ma soalaupule ai nisi o mataupu o loo fuafua e folasia i le fono a Malo o le Taupulega o le a usuia i Samoa.
