E maaleale tele le gagana Samoa e faamatala ai ituaiga o faamai e fesootai i ni feusua’iga e le malupuipuia, ma o loo iai le talitonuga o le mafuaaga lea o le toatele o tama ma teine talavou e le malamalama i auga o ia faamai, ma vave saili atu ai ni fautuaga faafomai e togafiti ai, a o lei oo ina tulai mai ni aafiaga e aafia ai tamaitai i ni tulaga faigata pe a oo ina ma’itaga.

O lea ua faatino e le Iunivesite Aoao o Samoa se polokalame e pueina ai ni faatalanoaga e mafai ai ona maua i se tulaga tutoatasi e le tagata faamatalaga e faamanino ai ia ituaiga o faama’i, ma avanoa ai ona saili se fautuaga faafoma’i.

O le faalapotopotoga o faasalalauga a le Malo o Ausetalia le ABC, ua fesoasoani malosi e faatupe lea taumafaiga a le Iunivesite i le naunautaiga e laveai le ola maloloina o tamaitai ma tupulaga uma o le atunuu, ao iai lo latou malosi faaletagata i le loloto o filifiliga tau faigauo.

Faaalia i se pepa o faasalalauga o faamai e mafua i feusuaiga e tatau ona faia ai ni suega poo test ina ia vave iloa ma togafiti loa i fualaau ma vailaau faafomai. O se tasi lea o gasegase ua siitia le numela o tamaitai ma tupulaga tama talavou ua aafia ai.