Faigata tele suega faataitai o le NCEA na sue ai fanau Pasefika o loo i totonu o le li’o a Niu Sila, lea e aofia ai Tokelau, le Atu Kuki ma Niue.
E le o fiafia faiaoga i le faaiuga o suega nei na faia i le masina o Setema o le tausaga talu ai, ma i se lipoti tutoatasi ua toe faailoa ai e faiaoga mai atunuu Pasefika nei, e faigata tele le suega.
E i le va o le 120 i le 180 fanau Pasefika na sue ai ma e na o le 19% na pasi i le numera, 21% i le faitau tusi ma le 27% o le tusitusi i le gagana Peretania.
O ni faaiuga e matuai maualalalo tele mai maka sa tatau ona ausia, e ui o loo ta’ua i le lipoti sa tele le taimi ma le malosi na tapena ai fanau.
O se suega foi na faia online ma ua toe faaali manatu ai nisi o faiaoga e tatau ona toe vaavaai i le faaaoga o pepa suega ona sa iai faaletonu i fesootaiga tau tekonolosi ma o le toatele foi e le lelei i le faaaogaina o masini komepiuta.
Pe a tuu mai i le faaupuga o fesili o suega, o le isi lea itu na faailoa e faiaoga o le faigata tele o faaupuga na faaaoga ma o le tasi lea itu na faafaigata ai ona o le toatele o fanau o le gagana Peretania o le latou gagana lona lua lea.
