E lē o le taimi muamua lenei ua lipotia ai le maua o le aufaigaluega tufameli pe kiliva meli foi o loo soona tau’ai afifi ma meli a tagata.
Ua lipotia i le vaiaso nei le maua lelei foi i nisi o ata a le CCTV o nisi o i latou ia o loo faatino foi tulaga faapea i meli i Brisbane.
Na molimau se tasi mafine na ia vaaia ma le faanoanoa lana oka sa faatali ma sa faatau online o loo fetogia’i solo i le van lea e kiliva ai meli ma ua atili faamaonia lea ina ua tatala atu le afifi ua matuā faaleagaina lava le oloa na oka.
O molimau foi a nisi ua ta’ua ai o le tulaga lava foi lea na maitauina ia latou meli ma e le gata ina faaleagaina ae o le fiu e tatali.
O loo tuuina mai se lapataiga ma se fautuaga i le lipoti lea i tagata ua silafia ia tulaga, ina ia faafesootai pisinisi sa fai ai a latou faatau ma faailoa iai tulaga ua tulai mai ma talosaga mo ni refunds ae mo oloa taugata e lelei foi pe a silasila i le totogi o le inisiua mo ia oloa a o lei lafoina ane i le meli.
