E faitua afe tagata faigaluega a le malo poo public servants o le a malolo mo vaiaso e lua i vaitau o aso fiafia ae maua pea totogi i lalo o suiga fou ua pasia ma malilie ai le Kapeneta.
O nei suiga fou a le Kapeneta ina ia malolo ai mo le 2 vaiaso o lona uiga e faatoa toe foi i galuega i le Aso 10 o Ianuari 2022. Na faamaonia mai e le Kapeneta o nei suiga faanatinati na faamaonia e faaiuga fai a le Malo i lenei vaiaso ma na faamautu mai e le Minisita ia Leatinuu Wayne Sooialo.
Taua e ripoti a le Samoa Observer ua autasi foi le Kapeneta e totogi tagata faigaluega i aso malolo poo essential workers a’o faaauau ai le latou tuatua i le atunuu. O i latou ia e aofia ai tagata faigaluega i le Soifua Maloloina, i latou o loo galulue i nofoaga faanofoesea, o le ofisa o le tau faapea le Matagaluega o Tupe faapea nisi o ofisa o le a galulue i lea taimi.
I le faasilasialga na tuuina mai e le matagaluega o Pisinisi Alamanuia ma Leipa na faamanino mai ai aso malolo o aso fiafia.
“E tusa ai ma aiaiga o le Fuaiupu 2 o le Tulafono o Aso Malolo mo Tagata Uma 2008 e faailoa atu ai e faapea, o le a faamamaluina aso o le a ta’ua i lalo e avea ma Aso Malolo mo Tagata Uma mo le faamanatuina o aso fiafia o le Kerisimasi ma le Tausaga Fou:
- Aso Toonai, 25 Tesema 2021
- Aso Gafua 27 o Tesema 2021
- Aso Toonai 1 o Ianuari 2022
- Aso Gafua 3 Ianuari 2022
E mafai ona tatalaina faleaoloa mo le faatauina o ola i Aso Malolo e tusa ai ma aiaiga o le Tulafono o Aso Malolo mo Tagata Uma 2008. E toe faailoa ma faamanatu atu i tagata e ona galuega e utagia tuutuuga mo le faafaigaluegaina o tagata faigaluega i Aso Malolo e tusa ai ma aiaiga i lalo o le Tulafono o Sootaga Va Lelei o Leipa ma Galuega 2013.
