I le silia ai nei ma le vaiaso o tau saili e leoleo ni faamatalaga e maua ai le taulealea o Silao Leleiga poo Silao Faaleleiga Leavasa, o le valu i le po o le Aso Toonai na tea nei na maua ai lea alii i se nofoaga i Aleisa ma pu’eina ai loa ma taofia i le vaavaaiga a leoleo.

O loo tuuaia Silao i se gaioiga na ia fao faamalosi ai ni meatotino a se tina mai Niu Sila sa malaga tafafao mai i Samoa ma ni ona alo se toalua. Faaalia e leoleo o lea taulealea sa falepuipui muamua i ni solitulafono, ma o le magalo ai i tua ae toe aafia ai i le faia o se isi solitulafono e pei ona tuuaia ai nei.

Ua ave ai le faafetai a le Matagaluega o Leoleo, Falepuipui ma le Ola Toe Fuataina i le atunuu i faamatalaga na tuuina atu ua mafai ai ona maua Silao ma ua nofo taofia ai nei mo suesuega.