E lei savali le malo i lana tala na fai mai o le a leai ni siitaga o totogi o ona tagata faigaluega o loo mauaina le silia ma le $100,000 i le tausaga e ui o lea sa iai.
Talu mai le 2020, o lea na faasā ona toe iai ni siitaga o totogi o tagata faigaluega i le malo e silia ma le $100,000 o latou totogi.
Peitai i le sau a’i ia Aperila o le tausaga talu ai, na lipotia ai e le Newshub e faitau afe tagata faigaluega o loo aofia i totonu o totogi maualuluga nei na maua lava siitaga o totogi.
Mai lea taimi seia oo mai ia Novema, o lea na toe maua foi siitaga o le isi 427 tagata faigaluega ma o i latou nei e aofia ai tagata e 89 e galulue i le matagaluega o le Social Development, 51 Energy Efficiency and Conservation Authority, 42 o tagata faigaluega i le Inland Revenue ma o loo iai foi ma le toalima tagata faigaluega a le komisi o galuega a le malo lea na sau ai le faaiuga o le lē toe faia o siitaga o totogi o i latou e silia ma le $100,000 totogi i le tausaga.
Ua upuia ai e le taitai o le ACT David Seymour i le fai mai o loo taumafai e faasao tupe a tagata totogi lafoga ae o lea e le o mafai ona faataunuu.
Ae na saunoa le Palemia Chris Hipkins, o loo ia lagolagoina pea le faatumau o le fautuaga o le leai o ni siitaga o totogi mo i latou o loo mauaina totogi maualuga nei.
Peitai o le tali a le komesina o galuega a le malo i tala a le Newshub, e iai lava nisi o mafuaaga tatau na faia ai pea siitaga o totogi mo nisi o le aufaigaluega.
