O le taeao nei e iloa ai le tali o le fesili poo ua iai ea Niu Sila i le recession, poo le pa’ū o le tamaoaiga e ala i fefaatauaiga ma auaunaga lautele.
O le faaletonu o le tamaoaiga o loo fua lea i le ono masina sosoo o leai se tupu o le Gross Domestic Product poo le GDP ma o le taeao nei lea o le a faailoa ai le lipoti o le uluai kuata o lenei tausaga mai le masina o Ianuari seia oo mai ia Mati.
A o tālia ai le kuata muamua o le 2023, o le kuata talu ai na faamauina ai le 0.6% pa’ū o le GDP ma afai ae toe sau le lipoti i le asō ae o le mea lava e tasi, o lona uiga ua faamaonia ai o loo iai Niu Sila i se tulaga pa’ū o lona tamaoaiga.
E eseese uma finagalo o tagata suesue tau i le tamaoaiga mai faletupe taitasi, ma o le a maua le tali manino i le toe kuata i le 11 i le taeao nei pe a faailoa mai e le Stats NZ.
