O le agai i le afiafi ananafi na maua ane ai lipoti ua maua le tino o si tamaitai 28 tausaga lea sa tau sailia i vaega o loo lolovaia o Niu Sa Uelese.
O le vaega o fesoasoani faavavave na valaau ane i Cooyal Creek i le faaitu o Gulgong pe a ma le 30km mai Mudgee talaatu anapo ina ua lipotia se taavale ua tafea i tafega.
O le avetaavale o se alii e 45 tausaga ma o le toalua o lana pasese o alii e toalua e 43 ma le 26 tausaga le matutua na mafai ona agai ese ma le taavale, peitai o si tamaitai lea pe ā ma le 28 tausaga sa tafea ese ma agai ai loa le sailiga.
I lipoti muamua mai leoleo a Niu Sa Uelese na ta’ua ai atonu na mafai ona agai ese le tamaitai mai le taavale fua i lipoti na o latou mauaina ae peitai e lei iloa poo fea tonu o iai, e faapea foi le taavale e lei maua.
O alii e toatolu sa iai faatasi i le taavale sa aveina atu i le ofisa o leoleo mo suesuega ma e lei afaina ae o le aso sa faaauau ai le sailiga o sia tamaitai ma maua mai ai loa le lipoti lata mai e faapea ua maua le tino o lea tamaitai.
E 142 lapataiga o lologa ua faamatuu mai mo le tuaoi lea o Niu Sa Uelese ma Vitoria agai atu i Kuiniselani ma sa tetele foi timuga i le aso ananafi.
