Ua faia nei sā e ta’ialaina ai le va’aiga o le pa moa i Otago lea e sau mai ai fuamoa o loo toe faatau, ona o le tala ua sau ua faamaonia ua maua ai le bird flu ma o lea foi ua pepesi.
O le vairusi lenei ua aafia ai moa ua ta’ua o le H7N6, ma o lea foi ua faamaonia mai e le Biosecurity a Niu Sila e ono iai le avanoa o lea na mafua mai i feiloa’iga ma isi manu felelei faapea pato.
O le vairusi ua faamaonia e faapea e vave lona pepesi.
Fai mai ai le matagaluega a le Primary Industries, o lea ua ia taofia lē tumau le laisene e fefaataua’i ai le pisinisi e anaina le pa moa, Mainland Poultry ma e taofia se’ia mautinoa ua saogalemu.
A o faia ai la le tiute o matagaluega eseese a le malo lea e gafa ma lea maketi, o lea foi ua iai suiga ua faia e le pulega o le pa moa, auā lava le puipui ma taofiofi le pepesi o le bird flu.
I tala i le taeao nei ua faamaonia mai ai o loo faaauau pea siaki mo le tusa ma le 160,000 moa, ma o le tala faanoanoa e tusa ma le 80,000 moa o le a vavae ese ma e ono oo atu ai lava ina tuu i lalo.
E leai ni lipoti o ni moa mamate poo ni moa ua mama’i e mafua mai i faamaoniga ua maua nei, ma e lē o iai foi se tulaga faapopoleina i le ono aafia atu ai o le soifua mālōlōina o tagata.
Puna o Faamatalaga: Controls in place as bird flu strain found in chickens at Otago egg farm
