Ua ta’ua mai lipoti i Ausetalia le taofia ai o isi alii talavou e tusa ma le fasiotia o le tina matua i Brisbane i Ausetalia lea na tatui (tulou) a o vaavaai atu iai si ana granddaughter e 6 tausaga le matua.
O le Aso Gafua na faaamaonia mai ai e leoleo ua taofia le isi toafā e ese ai le alii e toatasi lea na alu lava ia i totonu o le ofisa, ma o i latou nei o le 15 – 16 tausaga le matutua.
E 70 tausaga le matua o le tina ia Vyleen White ma e faapea o le uma ai o le faatauga na tulai mai ai loa i le kapaka i Redbank Plains i Sisifo o Brisbane.
Na maliu ai lava le tina i le nofoaga na tupu ai, ae e lei faamanu’alia lona alo tamaitai.
O le toatasi e oo mai i le taimi na tuufaatasia ai tala o le taeao ananafi ua molia ma o lea na tulai i luma o le faamasinoga i le Aso Gafua ma o le aso ananafi foi lea na faapea mai ai le komesina o leoleo a Kuiniselani e feiloai atu ai i le aiga faanoanoa o le tina matua ua maliu e tusa ma lipoti a le 1News.
O alii talavou e toafā na ave e leoleo i le Aso Gafua na maua mai i Ipswich ma na ta’ua e le sui o le ofisa o leoleo i Ipswich, o le a faaauau pea ona iai le van a leoleo i fafo o le Redbank Plains shopping centre i vaiaso a sau mo le mautinoa o le saogalemu o tagata lautele.
