O taumafaiga e ala i faalauiloa ma polokalame o loo autu i le tafiesea ma titina sauaga i totonu o aiga o loo aafia ai le ola mu’amu’a o fanau teine laiti faapea le ola ma le soifua o tina ma tamaitai o le atunuu, ua taunuu ise laasaga maualuga ina ua maua e Samoa le faailoga taualoa, o le polokalame o le spotlight iniotiative o loo taulamua ai le Matagaluega o tina ma tamaitai atinae o afioaga ma aga fesootai, faapea le lala o Malo Aufaatasi le UNDP, ma nisi o faalapotopotoga tumaoti o loo galulue e tineia sauaga faasaga i tamaitai ma fanau teine laiti.
O se faatasiga i le aai o Cancun ile atunuu o Mexico o loo auai se au malaga mai Samoa o loo taitaia e le Ofisa sili o le pulega o le matagaluega o tina ma tamaitai o Dr Mema Motusaga, na latou talia le faailoga taualoa, ua faamauina ai le maualuga o taumafaiga a Samoa ile tafi esea o sauaga i totonu o aiga aemaise o aafiaga o tina ma tamaitai ma fanau teine laiti mai sauaga.
O le pine faamau foi lea o le lelei ona faatino e lea matagaluega a le Malo ma isi faalapotopotoga tumaoti o polokalame faalauiloa ma a’oa’oga o loo unaia ai auala e taofia ai sauaga.
